སྡུག་གྱོང་ངོ་མ་སུ་ལ་འཕོག།

སྡུག་གྱོང་ངོ་མ་སུ་ལ་འཕོག།

ལ་རྒྱའི་ཚིག་འབྲུ་ལྗིད་མོའི་སེང་བར་ནས།།
ནང་དང་ཕྱི་ཞེས་མཛུབ་མོ་ཀེར་ཀེར་བས།།
ཕྱི་ནང་གཉིས་ལ་འགལ་བའི་ཁུང་འབིགས་པ།།
སྡུག་གྱོང་ངོ་མ་སུ་ཡི་མགོར་རྡོ་རེད།།

ལག་ངར་བཙོག་པ་གོས་པ་མ་ཚོར་བར།།
ཐག་རིང་དྲི་ངན་འདི་ན་འཐུལ་ཡོང་ཞེས།།
སྣ་ལ་སྦར་མོས་བཀབ་ནས་གཤེ་བྱེད་པའི།།
ལས་ཚུལ་འདི་ཡི་སྡུག་གྱོང་སུ་ལ་འཕོག།

ཕྱི་ཡི་དྲི་མ་ཕྱི་ནས་བཀྲུས་ན་ཆོག།
ནང་ནས་འདག་རྫས་བཏབ་པས་ཅི་ཞིག་ཕན།།
ནང་གིས་ནང་ནས་གཙང་མར་སྲུང་ཞིག་དང་།།
ཕྱི་ཡི་ཆུང་ཆུང་དེ་ཚོ་ཞི་རྒྱུ་རེད།

བཙོག་དྲི་ངན་ཞེས་མེ་རུ་སྦར་བྱས་ནས།།
དགུང་ལ་དར་ལྕོག་བཞིན་དུ་ཕྱར་བ་དེས།།
སེང་སེང་ཐམས་ཅད་དྲི་མས་འཐུམས་ངེས་པ།།
སུ་ཡི་སྣ་ལ་གཞུ་བའི་ཕ་བོང་རེད།།

ཕྱི་ལ་སྐྱག་པ་བཏང་བའི་དྲི་ངན་འདི།།
ནང་གི་སྐུ་སྲུང་ཐུགས་ལ་མ་གདུག་རོགས།།
ཕྱི་ནང་གཉིས་ཀ་དྲི་མས་ཁྱབ་ཚར་རྗེས།།
སྡུག་གྱོང་ངོ་མ་སུ་ཡི་མགོ་ལ་འཕོག།