སེམས་ཀྱི་དབྱངས།

སེམས་ཀྱི་དབྱངས།

ནམ་མཁའི་མཐའ་ན་ཟུག་པའི།།
འཇའ་ཚོན་མིག་ལ་མཛེས་པོ།།
ཞག་གསུམ་སེམས་ལ་ཤར་ཡང་།།
འདུན་མ་ཡོང་ས་མ་རེད།།

ཁ་དོག་མཚར་ལ་བསམས་ནས།།
སེམས་པའི་ཞགས་པ་བཏབ་ཀྱང་།།
རླུང་བུའི་གཡུག་ཕྱོགས་ཤིག་གིས།།
སྤྲིན་པའི་དཀྱིལ་ནས་ཡལ་སོང་།།

ཁྱེད་ནི་སེམས་ཀྱི་མེ་ཏོག།
མཛེས་སྡུག་དབྱིངས་ལ་བཞུད་སོང་།།
གཡུ་སྦྲང་བུང་བ་ང་ཡང་།།
དྲན་པའི་ཀློང་ནས་ཉལ་ཡོད།།

དམ་བཅའི་རི་མོ་རེ་རེ།།
ཡིག་འབྲུའི་ཚུལ་དུ་བྲིས་ཀྱང་།།
འགྱུར་བ་ཆུ་ཡིས་བཤལ་བ།།
སེམས་ཀྱི་ན་ཟུག་མིན་ནམ།།

དང་པོ་འཛུམ་ཞལ་རྒོད་པ།།
བདུད་རྩི་སྨན་མཆོག་འདྲ་ཡང་།།
མཐའ་མ་ལེ་ལན་མང་བ།།
བསམ་པའི་དུག་ཏུ་གྱུར་སོང་།།

ལས་འཕྲོ་ལས་འཕྲོ་ཟེར་ནས།
མ་ཎི་འདོན་འདོན་བྱས་ཀྱང་།།
ཚེ་འདིའི་ལས་ལ་མེད་ན།།
ཕྱི་མར་རེ་བ་མི་འདུག།
 ༢༠༡༧།༡༡།༣༠ དགོང་དྲོ། རིགས་གྲོལ།