དེང་རབས་ཀྱི་མཛེས་སྡུག།

མཁའ་སྤྲིན་སྨུག་པོའི་བར་ནས།།

ཐུག་སྒྲ་ངར་གྱིས་སྒྲོག་དུས།།

གཡུ་འབྲུག་སྔོན་མོ་ཞིག་ཀྱང་།།

སྐྲག་ནས་ལྐུགས་སུ་གྱུར་ཐལ།།

མཁའ་ལམ་མཐོ་པོའི་ཐོག་ན།།

ལྕགས་གྲུ་ནམ་ཕངས་གཅོད་དུས།།

བྱིའུ་ཆུང་ཅོ་ཀ་ཞིག་ཀྱང་།།

འཁང་ནས་ཁ་འདར་ལང་ཐལ།།

དེང་རབས་གྲོང་ཁྱེར་གསར་པར།།

སྣུམ་ཟ་འུར་གྱིས་འགུལ་དུས།།

རྟ་རྒན་རྐྱང་པོ་ཞིག་ཀྱང་།།

ཧོན་ནས་ཐང་ལ་འགྱེལ་ཐལ།།

བརྒྱ་བརྩེགས་མཁར་གྱི་ནང་ན།།

གློག་ཞུའི་འོད་ཟེར་འཕྲོ་དུས།།

ཉམ་ཆུང་སྣུམ་སྒྲོན་ཞིག་ཀྱང་།།

འགྱོད་ནས་རང་སར་ཞི་ཐལ།།

བརྗིད་ཆགས་བཟོ་ཁང་ཆེན་མོར།།

ལྕགས་ཀྱི་མི་བུ་ལས་དུས།།

འབྱོར་མེད་བཟོ་པ་ཞིག་ཀྱང་།།

དབུལ་ནས་སྤྲང་པོར་གྱུར་ཐལ།།

མཛེས་པོའི་སྐྱེད་ཚལ་གསར་པར།།

གཡོ་མེད་མེ་ཏོག་བཞད་དུས།།

གཡུ་སྦྲང་རྒས་པོ་ཞིག་ཀྱང་།

སྐྱོ་ནས་མིག་ཆུ་ཤོར་ཐལ།།

༢༠༡༢།༠༨།༡༠ ཉིན།