ནས་རྩམ་དཀར་པོ། (ལྷག་དཀར་གྱི་ཞོགས་ཟས།)

བརྗིད་ཆགས་ཕོ་བྲང་དཀར་པོ་འགྱིང་ས་ན།།

རྟེན་དང་མཛད་པ་དཀར་པོ་ལུས་ཟིན་པ།།

མགོན་གྱི་བླ་གཟའ་དཀར་པོའི་ཞོགས་པ་དེར།།

མཇལ་འཛོམས་ནས་རྩམ་དཀར་པོས་བསང་ཞིག་གསོལ།།

ཁ་བའི་འདབ་མ་དཀར་པོ་འབབ་ས་ན།།

ཡབ་ཡུམ་ཐུགས་སེམས་དཀར་པོ་ལུས་ཟིན་པ།།

རེས་གཟའ་ལྷག་པ་དཀར་པོའི་ཞོགས་པ་འདིར།།

དྲིན་ཅན་ནས་རྩམ་དཀར་པོས་སྨོན་ཞིག་འདེབས།།

གཞལ་ཡས་ཁང་བཟང་དཀར་པོའི་དྲོ་སྐྱིད་ནང་།།

སྤུན་ཉེའི་བྱམས་སྐྱོང་དཀར་པོ་ལུས་ཟིན་པ།།

རེ་བའི་ཞགས་ཐག་དཀར་པོའི་ཞོགས་པ་དེར།།

དྲན་གདུང་ནས་རྩམ་དཀར་པོས་སྐྱེས་ཤིག་འབུལ།།

མཛེས་པའི་གངས་རི་དཀར་པོའི་འདབས་རོལ་དུ།།

སྙན་དབྱངས་གླུ་ཚིག་དཀར་པོ་ལུས་ཟིན་པ།།

ཉན་འདོད་ལྷག་བསམ་དཀར་པོའི་ཞོགས་པ་འདིར།།

མཛའ་བརྩེ་ནས་རྩམ་དཀར་པོས་ཕྱིར་དྲན་བྱེད།།

ན་ཆུང་སེམས་པ་དཀར་པོའི་རྩེད་ར་རུ།།

བརྩེ་གྲོགས་ལ་བ་དཀར་པོ་ལུས་ཟིན་པ།།

བོད་ཀྱི་ཉིན་མོ་དཀར་པོའི་ཞོགས་པ་འདིར།།

དུངས་སེམས་ནས་རྩམ་དཀར་པོས་དྲན་ཐོ་བཀོད།།

༢༠༡༢།༠༨།༢༩  ཉིན།