སེམས་ཀྱི་རྦ་རླབས།

ཞི་བདེ་དང་

རང་དབང་

དྲང་བདེན་

ཇི་འདྲའི་བབས་ཆགས་ཤིང་

གསོན་ཉམས་ཀྱིས་ཕྱུག་པའི་བཀོད་པ་ཨང་།

ཆེས་གདོད་མའི་ནགས་གསེབ་ནས་འཚོ་མྱོང་བའི་སྤྲ་རྒན་ཚོས།

ཤ་ཁྲག་རུས་བཅས་ཀྱིས་གྲུབ་པའི་ཕུང་པོ་རེ་རེར་

རང་བཞིན་གྱིས་བཙད་པའི་གོ་ས་བྱིན་པའི་ལྟེས་དབང་ལས།

རང་རེ་སྟེ། སྨྲ་ཤེས་དོན་གོ་བའི་མི་བུ་དག་བྱུང་ཡོད་ཚོད།

འོན་ཀྱང་་་་་་་

ལོ་ནག་འདི་དག་གི་རིང་

གངས་རི་འདིའི་ཕར་རྒྱབ་ནས་འཚོ་བའི་ངའི་སྤུན་ཟླ་ཚོ།

ལྕགས་ནགས་ཀྱིས་བཏབ་པའི་སྦུ་གུའི་ནང་ན་

དངངས་སྐྲག་གི་མཆི་མ་བཞུར་ཞིང་

ན་ཟུག་གིས་སྨྲེ་སྔགས་འཆོར་གྱིན་པའི་ངོ་གདོང་རེ་རེ་

ཁྱོད་ཀྱིས་མཐོང་ཨེ་བྱུང་།

རྒོལ་གཏམ་དང་

སྡིག་དམོད་

དམའ་འབེབས་

སུ་ཞིག་གི་ངོ་གདོང་ན་

མེ་ལྕེ་བཞིན་འབར་གྱིན་

ངམ་ནག་དང་། ཞེ་གནག་གིས་བསླེབས་དུས།

ཉམ་ཆུང་དང་། བཟོད་སྒོམ་གྱིས་འཚོ་བའི་རྣམ་ཤེས་མང་པོས་

སྐྱོ་གདུང་ལ་བྱིན་པའི་ངུ་ཚིག་དེ་དག་

ཁྱོད་ཀྱིས་ཐོས་ཨེ་བྱུང་།

བཙན་གནོན་དང་

དྲག་གནོན་

གཉའ་གནོན་

སུ་ཞིག་གི་མགོ་ཐོག་ན་

རླུང་འཚུབ་ལྟར་སྡང་ཞིང་

དྲག་ཆར་བཞིན་བབ་ཡོང་དུས་

ཤ་ཆད་རུས་སྡུག་གིས་གཙེས་པའི་འཚོ་བ་རྐྱེན་པོ་

ཁྱོད་ཀྱིས་ཚོར་ཨེ་བྱུང་

ཁོ་ཚོའི་ལུས་ཐོག་ན།

ཁེ་དབང་དང་

མང་གཙོ་

འདྲ་མཉམ་ནི་

མོ་གཤམ་གྱི་བུ་དང་

ནམ་མཁའི་མེ་ཏོག་

ས་ཡི་འཇའ་ཚོན་བཞིན་དུ་དཀོན་པ་ནི་

ཁྱོད་ཀྱིས་ཨེ་ཤེས་ལགས།

འདི་ལོར་ཡང་་་་་་་་་

རེ་ཞགས་ལ་འདུན་མ་བརྐོས་པའི་སྤུན་ཟླ་མང་པོ་

ཁ་ཞེ་གཉིས་མེད་དང་

བློ་ཐག་རྦད་ཆོད་ཀྱི་ཀློང་ནས་

རང་དབང་དང་། འདྲ་མཉམ་

ཐོབ་ཐང་དང་། མང་གཙོ་ལ་གཅེས་པའི་ཚོར་བ་ཟབ་མོས་

གོ་ལ་འདིའི་ཅེར་མིག་ཡོད་ཚད་ཀྱི་མདུན་ནས་

བལྟས་བལྟས་དང་། རིག་རིག་གིས་འབར་སོང་།

ཡིད་སྐྱོ་བ་ཞིག་ལ་

དྲག་ཆས་དང་། གནག་ཆས་སྤྲས་པའི་འདྲེ་ལག་དེ་ཚོས།

འགྲོ་བ་མིའི་རིན་ཐང་ཡོད་ཚད་

སུ་ཞིག་གིས་རྩེད་ཆས་སུ་བྱིན་པ་བཞིན་

རྡུང་རྡེག་དང་། མེ་མདའི་གློགས་ཞགས་ཁྲོད་ནས་

ཚེ་སྲོག་གི་རྒྱུ་བ་རེ་རེ་བཞིན་ས་ཐོག་ན་བསྒྱེལ་ཞིང་

ཟུངས་ཁྲག་གི་ཐིགས་པ་རེ་རེ་བཞིན་ས་གཞིར་ཐིམ་སོང་།

ད་དུང་ཡང་་་་་་་་

སྙད་འདོགས་དང་

བསྙོན་འཛུགས་

ཁ་གཡོགས་ཀྱིས་དབང་ཤུགས་བར་མེད་ངོམས་ནས་

མུན་ཁུང་དུ་ཁྲིད་པ་ཇི་འདྲའི་མང་ཞིང་

ཚ་འདྲི་དང་། བཙན་འདྲིའི་མེ་འོབས་དཀྱིལ་ནས་

དྲན་མེད་དུ་འགྱེལ་བ་ཇི་ཙམ་ཡོད།

བློ་མ་ཕམ་སྤུན་ཟླ་ཚོ་

སྒེར་གཅོད་ཀྱི་མདུང་རྩེ་ཅི་འདྲའི་རྣོ་ཡང་

སྲིན་ནག་མཆི་གཙིགས་ཇི་འདྲའི་ངར་ཡང་

ལུས་ཟུངས་ན་ནར་ནར་དུ་འཁྲི་བའི་རྩ་ཐིག་རེ་རེར་

ས་སྐྱེས་རྡོ་སྐྱེས་ལས་གྲུབ་པའི་བཙན་པོའི་ཁྲག་རྒྱུན་འགོས་རྐྱེན་

ང་ཚོས་བློ་ཅི་ལ་ཕམ།

ཡི་ན་ཡང་་་་་་་

ངའི་སེམས་ཁམས་ན་རྦ་རླབས་ལྟར་འཕྱུར་ཞིང་

མེ་ལྕེ་བཞིན་འབར་འོང་མ་ནི་

ངའི་རྨི་ལམ་སྟེ་

མ་འོངས་པའི་བགྲང་བྱ་ཡི་ང་གདོང་རེ་རེ་

འཚེ་མེད་བསྟུན་མེད་ཀྱི་ཁ་བཏགས་དཀར་པོས་བསུས་ན་འདོད་པ་དེ་ཡིན།

༢༠༡༢།༠༢།༠༧ ཉིན