སེམས་ཀྱི་མེ་ཏོག་དམར་པོ།

དཀར་དམར་ལྷུ་མཚམས་བསྒྲིགས་པའི་ཞལ་གྱི་དབུས་།།

དཀྱུས་རིང་མིག་ཟུང་ཡང་ཡང་རྩེན་འདིའི་དཔལ།།

མེ་ཏོག་ཕྲེང་མཛེས་རབ་འབར་སྐྱེད་ཚལ་ན།།

ར་ཡིག་གཉིས་པ་མྱོས་པའི་གར་བཞིན་མཚར།།

ཞལ་དེའི་མཐའ་ནས་རབ་འགྱིང་སྒྲ་འཛིན་ཟུང་།།

རིན་ཆེན་ནོར་བུའི་རྒྱན་གྱིས་ལེགས་སྤུད་པ།།

འབྲས་ལྡན་འཁྲི་ཤིང་ལོ་མའི་རྩེ་མོ་ནས།།

ཆུ་ཡི་ཞེའུ་འབྲུ་གསར་པ་འཁྲུངས་པ་བཞིན།།

སོས་ཀའི་མཁའ་ལམ་རླུང་བུས་རབ་གཡོ་བའི།།

ཆུ་འཛིན་གསར་པ་ལང་ལོང་རྒྱུ་བ་ནི།།

བརྒྱད་གཉིས་བགྲང་བྱ་མྱོང་བའི་བྲང་གི་ངོགས།།

ལང་ལིང་གཡོ་བའི་ལང་ཚོའི་མཚན་མར་འཁུ།།

དེ་ཡི་སྟེང་ན་ཕྱེད་གཡོགས་སྐྲ་ལོ་ཡིས།།

ཁྱུ་མཆོག་རྒྱལ་མཚན་རལ་པའི་དཔལ་འཕྲོག་ཅིང་།།

སྣུམ་ཞིང་དམར་བའི་མགྲིན་སྔོན་རལ་པ་ཡིས།།

སྨིན་ལེགས་ཁྱོད་ཀྱི་མགོ་སྐྱེས་གྲོགས་སུ་འགུག།

མཆུ་ཡི་ཞལ་སྒོ་ཕྱེ་བའི་སྙན་དབྱངས་ཀྱིས།།

མཚོ་བྱུང་དགྱེས་པའི་མགུལ་ཡང་ཟིལ་གྱིས་གནོན།།

གཞན་ནི་དེ་འདྲའི་ངག་གི་འགྱུར་ཁུག་ཅིག།

རྣ་བ་བརྒྱ་ཡིས་ཉན་ཡང་ཐོས་རེ་བྲལ།།

འཛུམ་གྱི་མཁུར་སྐོང་མཛེས་པའི་ཞལ་ཉིད་ནི།།

ཚངས་པའང་འཇོམས་བྱེད་ཐིག་ལེ་མཆོག་མ་དང་།།

གཅིག་ལས་གཉིས་ནི་མི་ཕྱེད་དེ་ལྟ་ཡི།།

དཔལ་ཡོན་འཛིན་པ་མཆིས་ཚེ་དེས་ཀྱང་ངོ་།།

གང་ཁྱོད་མཚར་སྡུག་འཕྲོ་བ་ཁོ་ན་ཡིས།།

བཤོལ་མེད་མ་ཡི་རྗེས་སུ་མི་འགྲོ་སྟེ།།

སྐྱེ་བོར་འདོད་པའི་དཔལ་ཡོན་འཇོ་བ་ཡི།།

ཕུན་སུམ་ཚོགས་པའི་སྒྱུ་རྩལ་ལྡན་འདིས་ཀྱང་།།

དཀར་གསལ་དཀྱིལ་འཁོར་རྫོགས་པའི་ཁྱོད་ཀྱི་ཞལ།།

མཐོང་ཞིང་རི་བོང་འཛིན་པ་མཁའ་དབྱིངས་སུ།།

ས་དང་མཁའ་ལས་ཐ་དད་གཞན་གྱི་ཁྱད།།

མིག་བརྒྱ་སྤྲུལ་ནས་བལྟས་ཀྱང་རྙེད་དུ་མེད།།

སྨིན་ལེགས་མཉེན་ལྕུག་ཕྱག་གི་སོར་མོའི་དཔལ།།

མཚོན་སླད་པདྨའི་འདབ་མ་སྙེམས་མི་བྱ།།

དྲི་ཟའི་བུ་མོའི་ལུས་ཀྱི་སྟངས་སྟབས་ལའང་།།

དོ་ཟླ་བྲལ་བའི་ཆོས་དེ་ཡོད་ཕྱིར་རོ།།

ལྷ་ཡི་བུ་མོ་གངྒཱའི་ལུས་གཟུགས་ལ།།

གལ་ཏེ་དར་གྱི་ན་བཟས་བཀླུབས་གྱུར་ན།།

ཉིན་ལྟར་ཡིད་ཀྱི་མེ་ལོང་སྐོང་བྱེད་པའི།།

སེམས་ཀྱི་མེ་ཏོག་དམར་པོར་ལྷག་པར་འགྲན།།

ཡིད་འོང་བུ་མོའི་དཀར་གསལ་བྱད་བཞིན་ནི།།

དབྱིངས་སྔོན་ཟླ་བར་རབ་འཁུལ་མཛེས་སྡུག་མ།།

ཁྱོད་ཀྱི་ལུས་ལ་ཆགས་པ་ང་ཉིད་ཀྱིས།།

བསིལ་ཟེར་ཟླ་བའི་མགུལ་ནས་འཐམ་དུ་ཕྱིན།།

ཅི་སྟེ་མཆི་མེད་ལྷ་ཡི་སྐྱེད་ཚལ་ནས།།

དྲི་ཟའི་བུ་མོ་མི་ཡུལ་ཉུལ་བ་འམ།།

ན་ཆུང་བུ་མོའི་མཛེས་སྡུག་ལུས་པོ་ལ།།

རིན་ཆེན་རྒྱན་གྱིས་སྤུད་དམ་འཕྱང་མོ་ཉུག།

རྐང་དྲུག་འཕུར་ལྡིང་བྱེད་པའི་གེ་སར་ཅན།།

ཟིལ་གྱིས་གནོན་མཁས་ཤ་ཡི་མེ་ཏོག་དེ།།

པད་མས་ཕམ་པའི་མཱ་ལི་ཀཱ་མིན་ཏེ།།

བུ་མོའི་སོར་མོ་གདུ་བུས་བརྒྱན་པ་འོ།།

དཔྱིད་ཀྱི་ཆུ་འཛིན་གཡོ་བས་ཆར་རྒྱུན་འཇོ།།

སྟོན་རླུང་བསིལ་བས་འབྲུ་དང་སྦུན་པ་འབྱེད།།

དེ་དག་ཉིད་དང་རྩེ་ལྡན་ཁྱོད་ཀྱི་ཐུགས།།

ཕྱོགས་རྣམས་ཀུན་ནས་མཚུངས་སོ་ཡིད་འཕྲོག་མ།།

རྒྱས་པ་འགུག་བྱེད་ཀཱཤཱི་མཛེས་དགའ་མོ།།

གལ་ཏེ་རྒས་པའི་གཉེར་མས་བཅོམ་ཡང་རུང་།།

སྨིན་ལེགས་ཁྱོད་ཀྱི་བཞིན་ཟླ་དེ་ཉིད་ཀྱི།།

དགྲ་ཟླར་གྱུར་ཞེས་བརྗོད་འདོད་བདག་ལ་ཡོད།།

ཤ་འཇམ་མལ་གྱི་ནང་དུ་མཛེས་ལྡན་ཞིག།

འཆི་མེད་བུ་མོ་མ་ཡིན་ཡིད་འཕྲོག་ཁྱོད།།

ཧ་ཅང་སྙན་འདི་བུང་བའི་མགྲིན་དབྱངས་ནི།།

མིན་པས་སྨིན་ལེགས་མྱོས་པའི་འཁུན་སྒྲར་ངེས།།

འདམ་སྐྱེས་པད་མ་མཛེས་པའི་དཔལ་ཡོན་དང་།།

མཁའ་ལམ་དབུས་ཀྱི་ཆུ་ཤེལ་དབང་པོས་ཀྱང་།།

འགྲན་པའི་གོ་སྐབས་ཙམ་ཡང་བྲལ་བའི་དཔེར།།

རང་ཉིད་ཝ་ལེར་འཆར་འདི་སྨིན་ལེགས་མ།།

བསིལ་ཟེར་ཅན་དང་ཙན་དན་ཆུ་དང་གངས།།

ལྷོ་ཕྱོགས་མ་ལ་ཡ་ཡི་རླུང་ཚོགས་བཞིན།།

ཁྱོད་ཀྱི་རེག་པ་འཇམ་པའི་ངོ་མཚར་མཆུ།།

ཡོངས་སུ་འཐུང་འདོད་བདག་གི་སེམས་ན་ཡོད།།

ན་ཆུང་མཛའ་མོར་རེག་པའི་དཀར་འཇམ་ལུས།།

ཆུ་སྐྱེས་འདབ་མར་བསྙམས་པའི་དཔེ་རུ་འཁུམས།།

ད་དུང་རྣ་བ་འགུག་པའི་ངག་གི་སྒྲ།།

རྡུལ་ཁུས་མྱོས་པའི་བུང་བའི་མགྲིན་སྒྲ་ལྟར།།

སྨིན་ལེགས་བྱད་བཞིན་ཉ་གང་ཟླ་བའི་དཔལ།།

ཧ་ཅ་མཛེས་པས་མཐོ་རིས་བག་མ་དང་།།

རེག་པ་འཇམ་པས་ཆུ་སྐྱེས་སྔོན་མོའི་འདབ།།

གདུབ་རྒྱན་བཀྲ་བས་དབང་མོའི་དཔལ་ཡང་འཕྲོག།

ཝཱཎའི་རིག་རླབས་སྤྱིའི་འདོན་ཐེངས་ ༩ པར་འཁོད།