འོད།

ཁྱོད་བཞུགས་པའི་ལོ་ཟླ་ན།

གནས་འདི་ནི།

ཇི་འདྲའི་མཚར་ཞིང་ཇི་འདྲའི་མཛེས།

ཇི་འདྲའི་འཆོར་ཞིང་ཇི་འདྲའི་རྒྱས།

དེ་འདྲའི་བཙན་ཞིང་དེ་འདྲའི་འཕྱོ།

དེ་འདྲའི་མཐོ་ཞིང་དེ་འདྲའི་གཟར།

ཡིན་ན་ཡང་་་

སྐབས་དེ་ནས་ཁྱོད་དེ་ལྟར་བཞུད་པས།

འདི་ན་སྨག་རུམ་གྱིས་བཀླུབས་ཤིང་མུན་ནག་གིས་ཁྱབ།

དངངས་སྐྲག་གིས་རྒྱན་ཞིང་།

ངུ་ངག་གིས་གྱེར།

ད་དུང་ཡང་་་

འཇིག་སྐུལ་དང་བཙན་གནོན།

དབང་ཤུགས་དང་དམའ་འབེབས།

དྲག་སྣུན་དང་སྡུག་རྩུབ།

དེ་དག་གི་གསེང་ནས།

ཁོ་ཚོས་ཁྱོད་དྲན་ཞིང་།

ཁྱོད་ལ་སྒུག

ངོ་མ་ཁོ་ཚོས་དེ་ལྟར་རྒྱལ་མི་སྲིད་ལ།

གསོན་ཡང་མི་ཐུབ།

དེ་ལྟར་ཕམ་མི་སྲིད་ཅིང་འཆི་ཡང་མི་སྲིད།

དེ་ནི། ཕྱོགས་གཞན་ཞིག་ནས།

ཁྱོད་དེ་ལྟར་རྒྱས་ཤིང་།

དེ་ལྟར་འཚེར་འོངས་བས།

ཁོ་ཚོའི་སེམས་ན་དགའ་ཚོར་གྱིས་འདྲེན་ཞིང་།

བྲོ་གར་གྱིས་རྩེ།

སྐྱོ་གདུང་གིས་བསླུས་ཤིང་།

མིག་ཆུ་ཡིས་འདྲེན།

འོ་ཀྱང་་་

འདི་ན་ད་དུང་ཡང་མུན་ཁུང་དུ་ལུས་ཤིང་སྤྲིན་ནག་གིས་ཁེངས་འདུག།

                                                            འོད་དུས་དེབ་དོན་ཐེངས་ ༢ ཐོག་འཁོད།