ཚ་བ།

དཔྱིད་ཟླ་འདི་ཤར་རྗེས་་་  བསིལ་རླུང་དངས་མོ་ཞིག་ལྡང་རྒྱུ་ན་

ལྗོན་ཤིང་དག་གིས་བྲོ་གར་ལ་རྩེན་ངེས་ལ་

ཁུ་བྱུག་གཞོན་ནུས་གླུ་དབྱངས་ལེན་ངེས་

འོན་ཀྱང་་་་་ འདི་ན་འདི་ལོར་ཡང་ཚ་བ་སླེབ་ཀྱི།

མཚམས་མཚམས་སུ་

སྐར་ཚོམ་སྤངས་ལ་བཞད་འདྲའི་ནོར་ལུག་ཁྲོད་ཀྱི་

ཟླ་གཞོན་ཐང་ལ་བབས་འདྲའི་ལུག་རྫི་བུ་མོའི་ངག་གླུ་སྙན་མོ་

བདག་གི་རྣ་བའི་བུ་ཁར་ཡང་ཡང་འཆར་ཞིང་

བྱིས་དུས་ཀྱི་འཚོ་བ་སྐྱིད་མོར་དྲན་གསོ་རེ་སྟེར་དུས་

སེམས་ཆུང་ན་མེ་ལྕེ་ཇེ་འབར་ལས་ཞི་མི་ཐུབ་

སྐད་སྐུར་ཞིག་གིས་་་་ སྦྲ་ཁྱིམ་སྒོར་མོ་དེའི་སྒོ་ཁ་ནས་

ཨ་མ་རྒས་མོས་བདག་ལ་རེ་སྒུག་བྱེད་ཅིང་

ཨ་ཕ་ལོ་ལོན་གྱིས་བདག་ལ་སྨོམ་ལམ་འདེབས་ཀྱི་ཡོད་སྐད་

འཕངས་པ་ཞིག་ལ་་་་་ བདག་གིས་འདི་ལོར་ཡང་ཕ་ཡུལ་ལ་ལོག་མ་ཐུབ་

ཕ་ཡུལ་གྱི་རི་མགོ་ནས་ཁ་བ་བཞུར་གྱིན་ཡོད་ངེས་ལ་

ཕ་ཡུལ་གྱི་རྩ་ཐང་ན་མེ་ཏོག་བཞད་ཀྱིན་ཡོད་ངེས་

ཕ་ཡུལ་གྱི་ཆུ་གཞུང་ན་ཉ་མོ་འཁོར་གྱིན་ཡོད་ངེས་ཀྱང་

འདི་ན་འདི་ལོར་ཡང་ཚ་བ་སླེབ་ཀྱི།

རྒྱུན་ལྡན་ཞིག་ལ་་་་་ དཔྱིད་ཟླ་འདི་ཤར་རྗེས་

གནའ་བ་དང་གླ་བ་མང་པོས་རི་ཀླུང་ནས་རྒྱུ་ཞིང་

རྟ་རྒོད་དང་རྐྱང་དཀར་གྱིས་རྩ་ཐང་ནས་རྩེ་

ཁྲུང་ཁྲུང་མགྲིན་རིང་གིས་ལྗང་ཐོག་ཏུ་བབས་དུས་

ཕ་ཡུལ་གྱི་བཀོད་པ་ཇི་འདྲའི་མཛེས་ཨང་་་་

འོན་ཀྱང་་་་ འདི་ན་འདི་ལོར་ཡང་ཚ་བ་སླེབ་ཀྱི།

                                                            ༢༠༡༣།༠༣།༠༥ ཉིན།