ངག་གླུ་ཐད་སྦྱར་མ།

མཛེས་སྡུག་སྙིང་གི་མེ་ཏོག།

ཐག་རིང་སྤང་ལ་བཞད་པ།།

ཡིད་ཀྱིས་དྲན་པ་མ་གཏོགས།།

མཇལ་བའི་སྐལ་བ་མི་འདུག།

འགྱུར་མེད་སེམས་ཀྱི་སྡུད་པ།།

རྡོ་རྗེ་བྲག་ལ་བཏབ་ཀྱང་།།

ལས་དབང་བཙན་པོ་ཞིག་གིས།།

ཐལ་བའི་རྡུལ་དུ་བཏང་སོང་།།

  

མ་གསང་སེམས་ཀྱི་སྐད་ཆ།།

ཤབ་ཤུབ་རླུང་ལ་བསྐུར་ཡོད།།

མཉེན་ལྕུག་འདབ་མ་ཅན་མས།།

སྙན་གྱིས་གསན་པ་གནང་རོགས།།

དབང་ཆེན་སད་དང་སེར་བས།།

ལྗོན་པར་གནོད་པ་མེད་ན།།

མ་འགྱུར་སེམས་ཀྱི་ཟེའུ་འབྲུ།།

བརྟེན་པོར་གཟུང་རོགས་གནང་དང་།།

གྱེས་བྲལ་ལས་ཀྱི་འཁོར་ལོ།།

མི་སྡོད་ཕྱོགས་སུ་སྐྱོད་ན།།

མཇལ་འཛོམས་གསེར་གྱི་ཉི་མ།།

འཆར་བའི་སྨོན་ལམ་བཏབ་ཡོད།།

དབང་མེད་ལུས་ཀྱི་འཁྱེར་ཕྱོགས།།

བསྒྱུར་ནས་སླེབ་ཐབས་མེད་ན།།

ཞིམ་ངར་དྲི་བཟང་ཞིག་གི།།

གཏམ་ལན་ཡོད་པ་གནང་དང་།།

གཟུགས་མེད་སེམས་ཀྱི་འགྱུ་བ།།

འབྱུང་བ་རླུང་གིས་ཁྱེར་ན།།

འཆར་ཡན་རྟོག་པ་ཞིག་ནས།།

མཇལ་བའི་རི་མོ་བཀོད་ཆོག།

             ༢༠༡༢།༠༧།༣༠ ཉིན།