རང་ལ་དྲིས་པ།
འཁོར་བའི་བྱ་བ་ལ་ཁའི་ན་བུན།།
སྙིང་པོ་མེད་པ་ཀུན་གྱིས་ཤེས་ན།།
མཐོ་དམའ་བར་དང་སྐྱ་སེར་ཚང་མ།།
འཚང་ག་ཤིག་ཤིག་བརྩོན་དོན་ཅི་ཡིན།།
རྒྱུ་འབྲས་ཆོས་ཉིད་མདུང་རྩེ་ངར་མ།།
ངེས་པར་འགྱུར་བ་ཀུན་གྱིས་ཤེས་ན།།
དབང་ཆེན་མི་ཡི་སྟོབས་ཤུགས་འོག་ནས།།
ཉམས་ཆུང་འགྲོ་བ་མྱོང་དོན་ཅི་ཡིན།།
མཛེས་མཛེས་དངོས་གཤིས་སྒྱུ་མའི་རང་བཞིན།།
རྟག་པ་མིན་པ་ཀུན་གྱིས་ཤེས་ན།།
སྤྱན་གསུམ་པ་དང་ལྷ་ཡི་ཚོགས་ཀྱང་།།
གཟིགས་པའི་ངལ་བ་ཁུར་དོན་ཅི་ཡིན།།
བུ་མོའི་རང་སེམས་དབྱར་གྱི་གནམ་ངོ།།
བརྟན་པོ་མེད་པ་ཀུན་གྱིས་ཤེས་ན།།
མཐོ་ས་བླ་མའི་གསེར་ཁྲི་སྤངས་ནས།།
ཁྱིམ་གྱི་བྱ་བར་འཚངས་དོན་ཅི་ཡིན།།
ཕོ་ཡི་ལུས་རྟེན་དྲེགས་པའི་ཀ་ཆེན།།
དོན་གྱིས་སྟོང་པ་ཀུན་གྱིས་ཤེས་ན།།
མཁའ་འགྲོ་བྱོ་མོ་རིགས་ལྔའི་ཚོགས་ཀྱང་།།
དང་བས་འདྲེན་པའི་ངང་ཚུལ་ཅི་ཡིན།།
དཔོན་གྱི་གོ་ས་དགུང་སྔོན་མཐོ་པོ།།
བདེ་ཞིང་མིན་པ་ཀུན་གྱིས་ཤེས་ན།།
ཁ་བདེ་མགོ་བདེ་བླུན་པོའི་ཚོགས་ཀྱང་།།
ཐབས་ཀྱིས་དེ་ལ་འཛེག་དོན་ཅི་ཡིན།།
སྤྱི་ཡི་ཚོགས་པ་ཡིད་འཕྲོག་རྒྱུད་མང་།།
རེ་རེས་གྲུབ་པ་ཀུན་གྱིས་ཤེས་ན།།
ཚང་མར་དབང་བའི་གར་སྟེགས་སྟེང་ནས།།
རང་ཕྱོགས་ཁོ་ན་འཛིན་དོན་ཅི་ཡིན།།
ཕུགས་ཀྱི་བདེ་སྐྱིད་མལ་གྱི་རྨི་ལམ།།
ངེས་པ་མེད་པ་ཀུན་གྱིས་ཤེས་ན།།
མཐའ་དག་རང་རང་སྒེར་གྱི་ཁུག་མར།།
སང་ཉིན་ཆེད་དུ་གསོག་དོན་ཅི་ཡིན།།
༢༠༡༢།༠༧།༢༧ ཉིན།
Comments