གྲང་རེག་ཅན་མ།
ཚ་གདུང་དང་སྲིན་འབུ་ཡིས་སྡང་བའི་ནུབ་མོ་དེར་
རྨི་ལམ་དང་འཆར་ཡན་ཟུང་གིས་
ཁྱོད་ཀྱི་ངོ་གདོང་སྒོར་མོ་
བདག་གི་མིག་ཟུང་ན་སླར་ཡང་མངོན།
རེད་ཡ་་་
ཉིན་མོ་དེར་
མཆི་མས་བརླན་པོར་གྱུར་བའི་ཞལ་ཁྱིམ་དེས་
བདག་ལ་རེ་བའི་མིག་ཞགས་ཅིག་ཀྱང་འཕེན་ཁོམ་མེད་པར་
སུ་ཞིག་ལ་འཁང་བ་ཇི་བཞིན་
མགོ་མོ་ནང་དུ་དུད་ནས་དེ་ལྟར་བུད་སོང་།
རྒྱུན་ལྡན་རྒྱུན་ལྡན་ཞིག་ལ་
ངས་སྙན་ངག་གི་བག་མར་གཡེངས་དུས་
ཁྱོད་ཀྱིས་གསང་བ་ཞིག་རྟོགས་སོང་བ་ལྟར་
མིག་སེར་དང་ལེ་འདའ་བྱས་མྱོང་ཡང་
ད་ཆ་ཡོད་ཚད་རྨག་གིས་བཅོམ་པ་བཞིན་
ཁེར་རྐྱང་གི་འཚོ་བར་ཐིམ་སོང་།
ཁྱོད་ཀྱིས་བུད་ཤུལ་ནས་
དྲི་བསུང་ཞིག་རླུང་བུས་འདེད་པ་བཞིན་
གྲིབ་མ་ཞིག་རབ་རིབ་གྱིས་བཀོད་པ་བཞིན་
བདག་གི་མིག་ཟུང་དང་།
སྣ་ལམ་དུ་འཇགས་ཤིང་།
བྲང་ཁ་ན་འཚང་ཡོང་དུས་
དཔེ་དེབ་ཀྱི་འཚོ་བར་ཡང་སྙིང་པོ་མི་ལྡན་པ་
བདག་རང་ཉིད་ཀྱི་རྟོག་བཏགས་ལ་སེམས་ཀྱང་།
ད་ཆ་་་་་་་་་་་་་ སྙན་ངག་དང་རིང་དུ་གྱེས་ཏེ་
དོན་དངོས་ཀྱི་འཇིག་རྟེན་གཞན་ཞིག་ནས་
སྤྲོ་སྣང་གི་བསྐྱལ་བའི་ལོ་ཟླར་ཕྱིར་འདང་རེ་བྱེད་ཀྱིན
གས་ཆགས་དང་སྐྱ་མདོག་གི་འཚོ་བ་ཞིག་སྐྱོང་བཞིན་ཡོད།
༢༠༡༢།༠༧།༢༨ ཉིན།
Comments