འཕན་ལོའི་དོན།

གནའ་སྔ་མོ་སྔ་མོའི་དུས་ཞིག་ལ།།

 བོད་ཆོལ་གསུམ་གཅིག་ཏུ་མ་བསྒྲིལ་གོང།།

 རྗེ་ཟིང་པོ་རྗེ་ཡི་རྒྱལ་ཁབ་ལ།།

 ཡུལ་ངས་པོ་ཞེས་ནི་འབོད་ཅེས་ཟེར།།

ཡབ་རྣམ་རི་སྲོང་བཙན་སྐུ་ངོ་མས།།

 ཡུལ་ངས་པོ་དབང་དུ་བསྡུས་རྗེས་སུ།།

རྗེ་བང་སུམ་མངའ་ཁོངས་ཡོངས་ཪྫོགས་སུ།།

མིང་འཕན་པོ་ཞེས་ནི་བཏགས་སོ་ཟེར།།

 དེ་ཤེས་སམ་མི་ཤེས་དགེ་རྒན་ལགས།།

དེ་ཤེས་ན་མིང་འགོ་འཕན་ཞེས་པ།།

 དེ་མཚོན་པའི་དོན་དུ་བཀོད་པ་ཡིན།།

 དེ་མ་ཤེས་དེབ་ཐེར་གཟིགས་རོགས་མཛོད།།

 ད་ལོ་ཡི་ལོ་དོན་བཤད་པར་བྱ།།

 རྣ་སྲོང་པོར་འདྲོང་ལ་གཏམ་འདི་གསོན།།

 སྔོན་དགེ་བའི་བཤེས་གཉེན་སྤྱན་སྔ་པས།།

 དགོན་བཞེངས་པར་འདོད་ནས་གནས་བརྟག་རྗེས།།

ཡུལ་འཕན་པོ་ཞེས་པའི་ཡ་གྱལ་དུ།།

 ས་ཆེ་ཞིང་སྙོམས་པའི་གནས་ཡོད་པར།།

 ས་ལོ་བོ་གསུངས་ནས་དགོན་བཞེངས་པས།།

 མིང་ལོ་ཞེས་ཡོངས་སུ་གྲགས་སོ་ཟེར།།

 བོད་སྤྲུལ་སྐུ་རྣམ་གསུམ་ཐོས་ཨེ་ཡོད།།

ཐོས་ཡོད་ན་ལོ་ཞེས་གྲགས་པ་དེ།།

 ཁོང་སེམས་དཔའ་སྤྲུལ་སྐུ་བཞུགས་གནས་རེད།།

 དེ་མཚོན་ཕྱིར་ལོ་ཞེས་བཀོད་པ་ཡིན།།

 བོད་ཡུལ་ལ་མཆོད་པ་ལྔར་གྲགས་པ།།

 ཁྱེད་རྣམས་ཀྱིས་གསན་མྱོང་ཡོད་ངེས་ལ།།

 ལྷ་ས་ཡི་བཅོ་ལྔ་མཆོད་པ་གཅིག།

གུང་ཐང་གི་མེ་ཏོག་མཆོད་པ་གཉིས།།

 རྭ་སྒྲེང་གི་གི་ཁུ་བྱུག་མཆོད་པ་གསུམ།།

 བསམ་ཡས་ཀྱི་འདུས་སྡེ་མཆོད་པ་བཞི།།

 ལོ་དགོན་གྱི་གནམ་གང་མཆོད་པ་ལྔ།།

 དེ་ལྔ་ལས་མཐའ་མ་ལོ་ཡི་དོན།།

༢༠༡༢།༠༤།༡༠ ཉིན་དྲིས་ལན་གྱི་ཚུལ་དུ།