ཁྱི་དང་འདྲ་བའི་མི་ཞིག་གླེང་།

ཀ་ཁའི་དབྱངས་འགུག་མ་ཤེས།།

 ཁ་ཞེ་གཡུག་བཟོ་དོད་པ།།

 ག་ཡིན་འདི་ཡིན་མེད་པར།།

 ང་དང་ཁྱོད་ཅེས་རྩོད་ཀྱིས།།

 ཅ་སིང་རྩེད་འཇོར་གཡེང་ནས།།

 ཆ་ལུགས་ལས་ལ་མི་བརྩོན།།

ཇ་ཆང་ཤ་ལ་དགའ་དེས།།

 ཉ་དང་རུས་སྦལ་ཟ་གིས།།

 ཏ་ཐཱ་ག་ཐའི་བསླབ་ཟུང་།།

ཐ་ན་ཚིག་ཅིག་མ་ཤེས།།

 ད་དུང་མཁས་མདོག་སྟོན་དེར།།

 ན་ཟླ་གད་མོ་འཆོར་གྱིས།།

 པ་ཕའི་བསླབ་བྱ་མ་དྲན།།

 ཕ་ས་གཏིང་ནས་བརྗེད་པ།།

 བ་གླང་སྤྱོད་ཚུལ་ཅན་དེར།།

 མ་ཡིས་སྡང་སྨད་བྱེད་ཀྱིས།།

 ཙ་ཀྲ་དང་པོའི་གནས་དེ།།

ཚ་བའི་ཡོ་ལང་ཆེ་ཁར།།

 ཛ་གླང་སྨྱོ་སྤྱོད་ཅན་དེ།།

 ཝ་མོའི་གཡོ་བྱུས་ཆེ་གིས།།

 ཞ་སེར་བསྟན་པའི་ཞབས་རྗེས།།

 ཟ་འོག་རི་མོར་བཀོད་ནས།།

འ་ཐང་ཆད་མདོག་བྱེད་པར།།

 ཡ་མཚན་ཆེན་པོ་བྱེད་ཀྱིས།།

 ར་དང་ལུག་ངོ་མ་ཤེས།།

ལ་ཀླུང་ཁད་ཀྱིས་འགྲིམས་ཟེར།།

ཤ་གཟན་ཁྱི་རྒན་དེ་ལ།།

 ས་དང་གནམ་གྱིས་འཕྱ་གིས།།

 ཧ་ཆས་ངོ་ཚར་བསྐྱལ་ཀྱང་།།

 ད་དུང་སྤོབས་པ་ཆེ་བ།།

 ཨ་ཕོའི་ཞབས་འདྲེན་ལྟེ་བོ།།

ད་དུང་རྫིག་མདོག་སྟོན་གྱིས།།

                  ༢༠༡༢།༠༤།༧