‘’ ཁ་བ་་་་ ཁྱོད་ཡོང་རྒྱུ་ཨེ་ཡིན། “

མདང་ནུབ་སྒོ་དང་སྒེའུ་ཁུང་གི་སེང་བར་ནས་

སྨུག་སྤྲིན་དང་ཟིལ་ཆུ་འཛུལ་བས་

འབྱུང་ལུས་ཀུན་འཁྱག་གིས་བསྡམས་རྐྱེན་

ཁ་འདར་དང་བླ་འདར་ཁྲོད་ནས་

ཁྱོད་ལ་དྲན་པའི་སྣང་བ་ལྕི་མོ་ཞིག་གིས་

ང་རང་ལྷོད་ལ་བབས་མ་ཐུབ་

རེད་ཡ་་་་་་་་

བགྲང་བྱ་བཅུ་ཕྲག་གི་ཡར་སྔོན་ན་

ཁྱོད་ཀྱི་རབ་དཀར་གྱི་ཞིལ་ཁྱིམ་སྒོར་མོར་

འཛུམ་མདངས་ཀྱི་གཟི་འོད་འཕྲོ་བཞིན་

གཡའ་དག་པའི་འཇིག་རྟེན་དེར་བསུ་བ་རེ་བྱེད་དུས་

འཁོར་བ་དེ་ཇི་འདྲའི་མཛེས་སྡུག་གིས་བཀླུབས་པའི་རྩེད་ར་ཞིག་དང་

སྦྲ་ཁྱིམ་དང་སློག་ཧྲུལ་གྱི་སེང་རས་ཡོད་ཚད་ནས་

འགྲང་ངར་གྱིས་ཇི་འདྲ་བཙན་ཡང་

སྨུག་པ་དང་སྤྲིན་པ་

བ་མོ་དང་ཟིལ་ཆུ་

ཡོད་ཚད་ནས་ཡོད་ཚད་བདེ་སྐྱིད་ཅིག་རེད་ཨང་།

འོན་ཀྱང་། ད་ཆ་

ཁྱོད་ཀྱི་འཛུམ་མདངས་དང་

འཁོར་བ་ཡི་མཛེས་སྡུག་

ད་དུང་ཡང་། བདག་གི་བདེ་སྐྱིད་

ཐ་དག་རྨིས་ཟིན་པའི་རྨི་ལམ་ཞིག་དང་

སྒྱུ་མའི་ཁང་བཟང་ཞིག་པོ་ལྟར་

དེ་ལྟར་འགོག་མེད་ངང་གས་ཆག་ཏུ་གྱུར་སོང་།

གལ་ཏེ་་་་་་་

གྲུབ་ནས་ཞིག་པ་འཁོར་བའི་ཆོས་ཉིད་ལྟར་

ཞིག་ནས་གྲུབ་པ་ཡང་འཁོར་བའི་ཆོས་ཉིད་དང་

སྣང་བ་སྟོང་པ་སྒྱུ་མའི་རང་མདངས་བཞིན་

སྟོང་པ་སྣང་བ་ཡང་སྒྱུ་མའི་རང་མདངས་ཤིག་ཡིན་ཚེ་

ང་རང་སླར་ཡང་། ཁྱོད་ཀྱི་པང་དུ་ལོག་ན་འདོད་ཅིང་

ཁྱོད་ཀྱི་ཁོག་ཏུ་རུམ་ན་འདོད།

2011/12/21 ཉིན།