ཡ་རེ་ང་།

(མི་རིགས་ཀྱི་ཆེད་རང་ལུས་མེར་སྒྲོན་མཁན་སྤུན་ཟླ་ཚོར།)

སྟོད་ཉི་མ་ཐག་རིང་ནུབ་ལ་བརྒལ། །

ས་དོག་མོས་སྨག་རུམ་གྲོགས་སུ་བཀུག།།

ངེད་འགྲོ་བའི་མིག་ཟུང་མུན་སྟུག་པོར། །

སྤུན་སྒྲོན་མེའི་ཚོགས་ཀྱིས་འོད་འདྲེན་དུས། །

ད་ཕུ་ནུའི་སེམས་པ་ཡ་རེ་ང་། །

སྨད་ཟླ་བ་སྨུག་པོ་སྤྲིན་གྱིས་བསྒྲིབས། །

ཐུན་གསུམ་པོས་སྡུག་གི་བག་མ་བསུས། །

ངེད་མགོ་ནག་དམྱལ་བའི་གནས་མྱོང་ཚེ། །

སྤུན་སྒྲོན་མེའི་ཚོགས་ཀྱིས་སྐྱིད་འཚོལ་དུས། །

ད་ཕུ་ནུའི་སེམས་པ་ཡ་རེ་ང་། །

བྱང་སྐར་ཚོགས་སྨུག་དང་ཆར་གྱིས་གཡོགས། །

དགུང་སྔོན་མོས་འཁྱགས་ལ་སྔས་སུ་བསྟེན། །

ངེད་རྩམ་ཟན་བདེ་བའི་དྲོད་ཡལ་པོར། །

སྤུན་སྒྲོན་མེའི་ཚོགས་ཀྱིས་ཟེར་སྦྱིན་དུས། །

ད་ཕུ་ནུའི་སེམས་པ་ཡ་རེ་ང་། །

༢༠༡༢།༢།༡ ཉིན།