འགྱོད་སེམས།

(ངའི་སྐྱེས་སྐར་ལ་ཕུལ།)

དང་པོ་ཨ་མས་ང་ལ།།

གཞན་ཡུལ་མ་འགྲོ་གསུངས་བྱུང་།།

གལ་སྲིད་འགྲོ་དགོས་བྱུང་ཡང་།།

རང་ཡུལ་མ་བརྗེད་གསུངས་བྱུང་།།

 

བུ་ཆུང་མི་ཡུལ་བསླེབས་ནས།།

ཕ་ས་ཕ་ཡུལ་བརྗེད་འདུག།

ཡུམ་ཆེན་ཨ་མ་ཁྱེད་ལ།།

སྙིང་ནས་དགོངས་དག་ཞུ་འོ།།

དང་པོ་ཨ་ཕས་ང་ལ།།

གཞན་སྐད་མ་སྦྱང་གསུངས་བྱུང་།།

གལ་སྲིད་སྦྱོང་དགོས་བྱུང་ཡང་།།

རང་སྐད་མ་བརྗེད་གསུངས་བྱུང་།།

 

བུ་ཆུང་གཞན་སྐད་གོམས་པས།།

རང་སྐད་གཏིང་གིས་བརྗེད་འདུག།

ཡབ་ཆེན་ཨ་ཕ་ཁྱེད་ལ།།

སེམས་ནས་དགོངས་དག་ཞུ་འོ།།

 

དང་པོ་ཕ་མས་ང་ལ།།

གཞན་ལུགས་མ་སྦྱང་གསུངས་བྱུང་།།

གལ་སྲིད་སྦྱོང་དགོས་བྱུང་ཡང་།།

རང་ལུགས་མ་འདོར་གསུངས་བྱུང་།།

 

བུ་ཆུང་གཞན་ལུགས་ལོབས་པས།།

ཡུལ་གྱི་ཆ་ལུགས་དོར་སོང་།།

ཡབ་ཡུམ་དྲིན་ཅན་གཉིས་ལ།།

འདི་ནས་དགོངས་དག་ཞུ་འོ།།

༢༠༡༤།༡༡།༢༠ ཉིན།