ཉི་མ་ལགས།

ས་གཞི་མཐའ་དག་འཁྱག་གིས་བསྡམས་དུས

ཁྱོད་ཀྱི་བྱམས་བརྩེ་ཡིས་དྲོད་འཁོལ་སྦྱིན

འཇིག་རྟེན་གོར་མོ་སྨག་གིས་བཀླུབས་དུས

ཁྱོད་ཀྱི་ཟེར་འོད་ཀྱིས་མུན་པ་སེལ

ཉི་མ་ལགས   ཁྱོད་བདེ་བར་སྨོན

གངས་རི་ཞིག་གི་འོད་མདངས་འཇིག་དུས

ཁྱོད་ཀྱི་དཀར་འོད་ཀྱིས་འཛུམ་མདངས་སྦྱིན

ཆུ་བོ་ཞིག་གི་ཁ་མདོག་འགྱུར་དུས

ཁྱོད་ཀྱི་ཟེར་བརྒྱ་ཡིས་མདངས་རླབས་སྟེར

ཉི་མ་ལགས ཁྱོད་བདེ་བར་སྨོན

རྩ་ཐང་སྔོན་མོ་སད་ཀྱིས་འཇོམ་དུས

ཁྱོད་ཀྱི་གཟིགས་སྐྱོང་གིས་ལྗང་བུ་འབུད

ལུག་ལུ་དཀར་ཆུང་སྤྱང་གིས་གསོད་དུས

ཁྱོད་ཀྱི་ཐུགས་བརྩེ་ཡིས་ཚེ་སྲོག་གསོ

ཉི་མ་ལགས ཁྱོད་བདེ་བར་སྨོན

ས་མཐའ་ཞིག་ན་ཁེར་གྱིས་འཚོ་དུས

ཁྱོད་ཀྱི་ཐུགས་རྗེ་ཡིས་སྐྱབས་གྲོགས་སྦྱིན

རིགས་རུས་ཤིག་ལ་ཧམ་ཁྱེར་འབྱུང་དུས

ཁྱོད་ཀྱི་མཛད་བཟང་རེས་ལུས་ནད་གསོ

ཉི་མ་ལགས ཁྱོད་བདེ་བར་སྨོན

༢༠༡༣།༠༧།༠༥ དགོང་དྲོ།