སྨོན་འདུན།

                             

གནམ་ལོ་གསར་པ་བཞད་བྱུང་།།

སྨོན་ལམ་གསར་པ་བཏབ་ཡོད།།

རྒྱལ་ཀུན་ཐུགས་རྗེ་ཅན་པོས།།

སྐྱབས་དང་མགོན་ཞིག་མཛོད་དང་།།

ཚེས་གཅིག་བླ་མའི་ལོ་གསར།།

བླ་མའི་ཞབས་ལ་མཆོད་ཡོད།།

བླ་མ་སྐུ་ཚེ་བརྟན་ཅིང་།།

མཛད་འཕྲིན་རྒྱས་པའི་སྨོན་ལམ།།

ཚེས་གཉིས་རྒྱལ་པོའི་ལོ་གསར།།

མི་དཔོན་ཁྱེད་ལ་མཆོད་ཡོད།།

མི་རྗེ་ལྷག་བསམ་ཅན་པོའི།།

ཐུགས་འདུན་འགྲུབ་པའི་སྨོན་ལམ།།

ཚེས་གསུམ་ལྷ་སྲུང་ལོ་གསར།།

ལྷ་དང་སྲུང་མར་མཆོད་ཡོད།།

ལྷ་སྲུང་དམ་ཚིག་ཅན་དག།

ནུས་མཐུ་རྒྱས་པའི་སྨོན་ལམ།།

བཀྲ་ཤིས་བོད་ཀྱི་ལོ་གསར།།

སྤུན་ཟླའི་ཕྱོགས་ལ་མཆོད་ཡོད།།

སྤུན་དང་ན་ཟླའི་རྨི་ལམ།།

མངོན་དུ་འགྱུར་བའི་སྨོན་ལམ།།

བདེ་ལེགས་བོད་ཀྱི་ལོ་གསར།།

བོད་ཡུལ་ཕྱོགས་ལ་མཆོད་ཡོད།།

བོད་ལྗོངས་ཨ་མའི་དཀའ་སྡུག།

མྱུར་དུ་ཞི་བའི་སྨོན་ལམ།།

ཕུན་ཚོགས་བོད་ཀྱི་ལོ་གསར།།

མེས་པོའི་མདུན་དུ་མཆོད་ཡོད།།

མེས་པོའི་ཞབས་རྗེས་རིང་མོ།།

ཡུན་དུ་གནས་པའི་སྨོན་ལམ།།

ཕྱི་ལོ ༢༠༡༤།༠༣།༣  །བོད་རབ་གནས་ཤིང་རྟ་ལོའི་གནམ་ལོ་གསར་ཚེས་ཀྱི་ཚེས་གཉིས་ཞོགས་པ་ཤར་མར་བྲིས།