འཁྲུངས་སྐར་བསུ།

ཤིང་ཕག་ལོ་ཡི་སྣོན་ཟླའི་ཚེས་ལྔ་ཉིན།། 

སྟག་འཚེར་ཡུལ་གྱི་ཕལ་པའི་ཁྱིམ་ཚང་དུ།།

 མཚན་བཟང་སྟོང་དང་བཅས་ཏེ་འཁྲུངས་པ་ན།། 

ལྷ་མོ་དོན་གྲུབ་གསོལ་དེའི་འཁྲུངས་སྐར་བསུ།། 

 དགུང་གྲངས་བཞི་དང་ཕྱེད་ལ་ཕེབས་པའི་དུས།།

 ལྷ་ལྡན་གཞུང་དུ་སྲིད་ཁྲིར་མངའ་གསོལ་བས།། 

བོད་ལྗོངས་དགའ་སྐྱིད་ཉི་ཟེར་འབུམ་བཞད་ཚེ།། 

བསྟན་འཛིན་རྒྱ་མཚོར་གསོལ་དེའི་འཁྲུངས་སྐར་བསུ།། 

 དགུང་ལོ་དྲུག་ནས་བོད་ཡིག་བྲིས་ཀློག་དང་། 

 རིག་པའི་གནས་ལྔ་དག་དང་ལྷག་པར་དུ།། 

ནང་དོན་རིག་པའི་གཞུང་ལུགས་སྦྱངས་མཛད་ནས།།

 བསྟན་པའི་བདག་པོར་གྱུར་དེའི་འཁྲུངས་སྐར་བསུ།།

 ལྔ་བཅུ་ཐམ་པའི་ཛ་དྲག་མེ་ལྕེའིི་ཁྲོད།། 

ཆབ་སྲིད་ཞིག་རལ་ཕྱག་ཏུ་ཕུལ་བ་ན།། 

རང་གཞན་ཀུན་ལ་ཕན་པའི་ཐུགས་བསྐྱེད་ཀྱིས།། 

སྲིད་ཀྱི་རྒྱལ་པོར་གྱུར་དེའི་འཁྲུངས་སྐར་བསུ།། 

 ང་བཞི་ལོ་ལ་རྒྱ་ཡུལ་བྱོན་མཛད་ནས།། 

མའོ་དང་ཏིང་སོགས་རྒྱ་ཡི་དཔོན་རིགས་ཚོར།། 

བོད་ཀྱི་བདེ་སྡུག་གྲོས་བསྡུར་ལེགས་མཛད་ནས།། 

ཞི་བས་མཐུན་ཐབས་མཛད་དེའི་འཁྲུངས་སྐར་བསུ།། 

 ང་དྲུག་ལོ་ལ་སྟོན་པའི་རྗེས་དྲན་ཆེད།། 

ཧིན་དྷུའི་ཡུལ་དུ་བྱོན་ནས་དད་ལྡན་ཚོར།། 

བཀའ་ཡི་བདུད་རྩི་ཆར་ཕབ་མཛད་པ་ཡི།། 

དུས་ཀྱི་སྟོན་པ་ཁྱོད་ཀྱི་འཁྲུངས་སྐར་བསུ།། 

 ང་དགུ་ལོ་ལ་དགྲ་ཡི་ཀྲོ་དི་ཏ།། 

མེ་ལྕེ་བཞིན་དུ་མཆེད་པ་མ་བཟོད་པས།། 

ས་མཐའི་ཡུལ་དུ་སྐྱབས་བཅོལ་བྱོན་མཛད་དེ།། 

བོད་འབངས་བྱིན་ཀྱིས་བསྐྱངས་དེའི་འཁྲུངས་སྐར་བསུ།། 

 རྡ་རམ་ས་ལའི་རི་རྩེར་བཞུགས་ཙ་ན།།

 ཀརུ་ནའི་འོད་ཟེར་ཕྱོགས་བཅུར་འཕྲོ་མཛད་ཅིང་།། 

ལྷག་པར་བོད་འབངས་ཡོངས་ཀྱི་བདེ་སྡུག་ཆེད།། 

སློང་མོའི་ཚུགས་ཀ་བཟུང་དེའི་འཁྲུངས་སྐར་བསུ།། 

 བོད་དོན་བདེན་མཐའ་མྱུར་དུ་གསལ་བའི་ཆེད།། 

འཛམ་གླིང་མཉམ་འབྲེལ་རྒྱལ་ཚོགས་ཞེས་གྲག་པར།། 

ཕྱག་གཉིས་ཐལ་མོ་སྦྱར་བའི་ཞུ་ཡིག་དག། 

ཡང་ཡང་འབུལ་བར་མཛད་དེའི་འཁྲུངས་སྐར་བསུ།། 

 རྡ་རམ་ས་ལའི་རི་ཡི་སྐེད་པ་ན།།

 རང་གཞུང་དགའ་ལྡན་ཕོ་བྲང་ལེགས་བཙུགས་ནས།། 

ཕྱི་ནང་བོད་མིའི་བདེ་སྡུག་སེལ་བའི་ཆེད།། 

དཀའ་བ་བརྒྱ་ཕྲག་མཛད་དེའི་འཁྲུངས་སྐར་བསུ།། 

 མ་འོངས་བོད་ཀྱི་ཆབ་སྲིད་ལུང་བསྟན་ཆེད།། 

རྩ་ཁྲིམས་ཟིན་བྲིས་ཁྱབ་བསྒྲགས་ལེགས་མཛད་ཅིང་།། 

མང་གཙོའི་འཛིན་སྐྱོང་ལམ་སྲོལ་བཟང་པོའི་སྟེང་།།

 བོད་འབངས་ཁྲིད་པར་མཛད་དེའི་འཁྲུངས་སྐར་བསུ།། 

 འཕགས་པའི་ཡུལ་ནས་རང་རིགས་གཞོན་ནུའི་ཆེད།། 

དགོན་པ་སློབ་གྲྭ་མང་པོ་གསར་བཙུགས་ཀྱིས།།

 ཆོས་དང་སྲིད་དང་དེང་རབས་ཤེས་ཡོན་སོགས།། 

སྔར་མེད་ལམ་བཟང་གཏོད་དེའི་འཁྲུངས་སྐར་བསུ།། 

 ཞི་བའི་དོན་ཚན་ལྔ་ཡི་གསལ་བསྒྲགས་ཀྱིས།། 

འཚེ་བ་མེད་པའི་ལམ་བཟང་བསྟན་པ་ཡིས།། 

འཛམ་གླིང་སྐྱེ་འགྲོའི་མིག་ཟུང་འབྱེད་མཛད་པ།། 

སེམས་དཔའ་ཆེན་པོ་ཁྱོད་ཀྱི་འཁྲུངས་སྐར་བསུ།། 

 འགྲོ་བའི་རིགས་ཀུན་དག་ལ་དབྱེར་མེད་དུ།

 ཕན་པའི་མཛད་འཕྲིན་རྟག་ཏུ་བསྐྱངས་པ་ཡིས།།

 ནོ་སྦེལ་ཞི་བདེའི་གཟིངས་རྟགས་འབུལ་བཞེས་སོགས།།

 བླ་མེད་འཕྲིན་ལས་བསྐྱངས་དེའི་འཁྲུངས་སྐར་བསུ།། 

 འཛམ་གླིང་ཡུལ་གྲུ་གང་སར་ཞབས་བཅག་ནས།། 

 རྐང་གཉིས་མི་ཡི་འགན་འགུར་ངོ་སྤྲོད་དང་།།

 ཡ་རབས་བཟང་པོའི་ལམ་སྟོན་མཛད་པ་སོགས།། 

གཏན་བདེ་འབྱུང་གནས་ཁྱོད་ཀྱི་འཁྲུངས་སྐར་བསུ།། 

 ཆོས་ལུགས་ཁག་གི་དམིགས་ཡུལ་གཅིག་ཡིན་ཞེས།། 

གསུང་དབྱངས་ཡན་ལག་དྲུག་ཅུའི་ཆུ་རྒྱུན་དག། 

ཡང་ཡང་འཇོ་བར་མཛད་པའི་འགན་བཞེས་པ།། 

རྐང་གཉིས་གཙོ་བོ་ཁྱོད་ཀྱི་འཁྲུངས་སྐར་བསུ།། 

 གནའ་རབས་གཙོ་བོ་སེམས་ཀྱི་ཚན་རིག་དང་།། 

དེང་རབས་ཕྱི་ཡི་ཚན་རྩལ་རིག་པ་གཉིས།། 

འགལ་མེད་ཟུང་འབྲེལ་ལམ་བཟང་འདི་འོ་ཞེས།། 

ཚན་རིག་སྨྲ་བའི་དབང་པོའི་འཁྲུངས་སྐར་བསུ།། 

 རིགས་དང་རུས་ཀྱི་དབྱེ་བ་མ་ཕྱེ་བར།། 

ཐམས་ཅད་དྲིན་གྱིས་བསྐྱངས་པའི་མཚོན་དོན་དུ།།

 ཨ་རིའི་གསེར་གྱི་རྟགས་མས་གཙོ་བྱས་ཏེ།།

 གཟེངས་རྟགས་མང་པོས་མཆོད་དེའི་འཁྲུངས་སྐར་བསུ།།

 ལྷག་པར་ཐུབ་པ་ཆེན་པོའི་རིང་ལུགས་ལ།། 

ལམ་སྟོན་སྒྲོན་མེར་གྱུར་བ་ཉག་གཅིག་པོ།།

 རྒྱལ་བསྟན་ཡོངས་ཀྱི་མངའ་བདག་གསོལ་བ་ན།། 

གྷོ་ཏམ་གཉིས་པར་གྱུར་དེའི་འཁྲུངས་སྐར་བསུ།།

 འཕགས་པའི་ཡུལ་དུ་བསྟན་པ་སླར་དར་ཆེད།། 

ཐུགས་བསྐྱེད་དམ་བཅའ་བཞི་པ་མཛད་པ་ཡི།། 

རྒྱ་གར་པཎ་གྲུབ་ཡོངས་རྫོགས་འཁྲུངས་འདྲ་བའི།། 

སྐྱབས་མཆོག་ཕྱག་ན་པད་མོའི་འཁྲུངས་སྐར་བསུ།།

 མདོར་ན་དུས་རབས་འདི་ཡི་ཉིན་བྱེད་དེ།། 

འགྲོ་བའི་མགོན་པོ་བསྟན་འཛིན་རྒྱ་མཚོ་ཡི།། 

མཛད་པའི་ཟུར་ཙམ་ཡི་གེར་ཕབ་བྱས་ནས།། 

གྱ་ལྔའི་འཁྲུངས་སྐར་བསུ་ལ་བདག་སྤྲོ་འོ།། 

 འདི་ཙམ་གྱིས་ནི་མཆོད་པ་བགྱིས་པའི་མཐུས།། 

བདག་གི་དགེ་བའི་ས་བོན་ལེགས་འཕེལ་ནས།།

 འདི་ཕྱི་གཏན་གྱི་སྐྱབས་གནས་དམ་པ་ཡི།།

 སྐུ་ཚེ་མི་ཤིགས་བསྐལ་བརྒྱར་རབ་བརྟན་ཤོག། 

 ཞེས་པ་འདི་ཡང་སྤེན་པའམ་སྨྱུག་མིང་རིགས་གྲོལ་དུ་འབོད་པས་ཕྱི་ལོ་ ༢༠༢༠ ཟླ་ ༠༦ ཚེས་ ༠༥ ཉིན་༧གོང་ས་མཆོག་གི་དགུང་གྲངས་གྱ་ལྔའི་འཁྲུངས་སྐར་ཤིས་ཚིག་ཏུ་ཤར་མར་བྲིས།