ས་ཆ་ཞིག་ལ་བལྟས་པ།

 

རིག་གཞུང་རིག་གཞུང་ཟེར་མཁན་མང་ས་འདིར།།

གཞན་གྱི་ཆ་ལུགས་འཛིན་པ་མང་མང་རེད།།

སྐད་ཡིག་སྐད་ཡིག་ཟེར་མཁན་མང་ས་འདིར།།

གཞན་སྐད་བསྲེས་སྐད་འཆད་མཁན་མང་མང་རེད།།

 

༸སྐྱབས་མགོན་སྐྱབས་མགོན་ཟེར་མཁན་མང་ས་འདིར།།

༸རྒྱལ་བར་མཚན་སྨོད་བྱེད་མཁན་མང་མང་རེད།།

ལ་རྒྱ་ལ་རྒྱ་ཟེར་མཁན་མང་ས་འདིར།།

རིགས་ཀྱི་བླ་སྲོག་འཚོང་མཁན་མང་མང་རེད།།

བྱམས་སེམས་བྱམས་སེམས་ཟེར་མཁན་མང་ས་འདིར།།

གཞན་གྱི་མགོ་མོ་སྐོར་མཁན་མང་མང་རེད།།

སྙིང་རྗེ་སྙིང་རྗེ་ཟེར་མཁན་མང་ས་འདིར།།

ཉམ་ཆུང་མགོ་བོ་གནོན་མཁན་མང་མང་རེད།།

 

ཕ་ཡུལ་ཕ་ཡུལ་ཟེར་མཁན་མང་ས་འདིར།།

རང་ཁ་ནུབ་ལ་ཕྱོགས་པ་མང་མང་རེད།།

ཆིག་སྒྲིལ་ཆིག་སྒྲིལ་ཟེར་མཁན་མང་ས་འདིར།།

ཕྱོགས་རིས་འཐེན་འཁྱེར་ཅན་པོ་མང་མང་རེད།།

2014/01/08 ཉིན།