འགྲུལ་བཞུད་པ།

མིག་ཟུང་མདུན་ལ་ཕྱོགས་པའི་རེ་བ་དེས།།

སེམས་པའི་ཁ་མདོག་མོག་པོར་བྱས་པ་ཡིས།།

རྐང་ལམ་མགོ་རྔ་མེད་པའི་སྒལ་སྟེང་ནས།།

རྡོག་ཁྲེས་ཕྲག་ལ་འཁུར་བའི་ངལ་བ་བསྟེན།།

མདུན་ལམ་དོག་པོ་ཞིག་ལ་མིག་བསྲིངས་ཏེ།།

ཡིད་ཀྱི་འདུན་པ་གོང་དུ་འཕེལ་ན་ཡང་།།

ལུས་ཀྱི་ངལ་བ་འཁྱོག་པོའི་འགྲོས་ཆུང་དེས།།

ཆང་དམ་བཅུ་ཡིས་བཟི་བ་གྲོགས་སུ་བཀུག།

བར་སྣང་མཐིང་ག་ཅན་དེར་ཁ་ཕྱོགས་པས།།

ཡིད་ཀྱི་སྒོ་ཁར་འཇའ་ཚོན་ཤར་ན་ཡང་།།

རྐང་འགོ་རྡོ་ལ་བརྡབ་པའི་ན་ཟུག་དེས།།

ལུས་ཀྱི་སྟོད་སྨད་འཇིག་པའི་གཡང་དུ་འཁྲིད།།

ཉི་ཟེར་མེ་ཏོག་འདྲ་དེར་བློ་བཅོལ་བས།།

ཡོད་ཚད་མིག་གི་སྨན་དུ་གྱུར་ན་ཡང་།།

ལུས་ཀྱི་སྐྱི་པགས་མེ་ལ་སྲོ་བ་དེས།།

ཟུངས་ཀྱི་སྙིང་པོ་གཤེར་ཁུའི་གསང་དུ་བརྫངས།།

དྲི་གཞོན་བར་ནས་འགྱུ་བའི་མཛེས་སྡུག་གིས།།

སེམས་པའི་ངལ་བ་ཅུང་ཙམ་སེལ་ན་ཡང་།།

ངོ་ན་འགྲམ་ལྕག་ཞུ་བའི་ངང་ཚུལ་དེས།།

ང་ཡང་ཁྱོད་ལ་སྐྲག་པའི་སྣང་བ་སྟེར།།

ཆར་པ་ཟིམ་ཟིམ་ཞིག་གི་རྗེས་ཟིན་ནས།།

སྐོམ་པའི་གདུང་བ་ཡུན་གྱིས་གསོས་ན་ཡང་།།

རྒྱབ་ཀྱི་ཁུག་མ་རློན་པར་བྱས་པ་ཡིས།།

ཡོད་ཚད་ཆུ་ལ་བསྐུར་བའི་ཚོར་བ་བྱུང་།།

                                           ༢༠༡༣།༡༠།༢༢ ཉིན།།